COVID-19 awareness blog
COVID-19Health

കൊറോണ വൈറസ് ലോകത്താകമാനം നാശം വിതക്കുമ്പോൾ നാം പഠിക്കേണ്ട പാഠങ്ങൾ

കൊറോണ വൈറസ് അതിന്റെ അശ്വമേധം നടത്തുന്ന ഇക്കാലത്ത് ഒരു ദിവസം ഒരു പഴയ (ഏതാണ്ട് 20 വർഷം) മൈക്രോബയോളജി പുസ്തകം എന്റെ കൈയിൽപ്പെട്ടു. വെറുതെ പേജുകൾ മറിച്ചുനോക്കുമ്പോൾ കാണാം അപ്രധാനമായ ഒരു പേജിന്റെ മൂലയിൽ ആരാലും ശ്രദ്ധിക്കപ്പെടാതെ കിടക്കുന്നു മൂപ്പർ. ഒരു നിരുപദ്രവകാരിയുടെ പരിവേഷത്തോടെ. സാധാരണയായി കാണുന്ന പനി, ജലദോഷം, ചുമ എന്നിങ്ങനെയുള്ള ചെറിയ അസുഖങ്ങൾ പകർത്തുന്ന ഒരു സാധാരണ വൈറസ്.

കൊറോണ വൈറസ് ഒരു ആർ.എൻ.എ. വൈറസ് ആണ്. അതിന്റെ രൂപം ഏതാണ്ട് ഒരു കിരീടം പോലെയുണ്ട്. അതുകൊണ്ടാണ് വൈറസിന് ഈ പേർ ലഭിച്ചത്. പക്ഷികളിലും സസ്തനികളിലും ഇത്തരം വൈറസുകൾ ജീവിക്കുന്നു, തക്കം കിട്ടിയാൽ മനുഷ്യരിൽ രോഗമുണ്ടാക്കുന്നു. രോഗികൾ ചുമയ്ക്കുമ്പോഴും തുമ്മുമ്പോഴും പുറത്തേക്കുവരുന്ന കണികകളിലൂടെയാണ് (Droplets) ഇവർ മറ്റുള്ളവരിലേക്ക് പകരുന്നത്. മൂക്കിലും തൊണ്ടയിലും ഇവ ‘കോളനികൾ’ (Colonization) ഉണ്ടാക്കി വസിക്കുന്നു. കഥ തീർന്നു. ശുഭം.

COVID-19 virus graphic image

120 നാനോ മീറ്ററാണ് വൈറസിന്റെ വലിപ്പം. അതായത് ഇലക്ട്രോൺ മൈക്രോസ്ക്കോപ്പ് വേണം കാണാൻ. സാധാരണയായി വവ്വാൽ, പക്ഷികൾ എന്നിവയാണ് ഇത്തരം വൈറസിന്റെ വാസസ്ഥലം (Natural Reservoir). ചിലപ്പോൾ ചില മൃഗങ്ങൾ (ഉദാ: ഒട്ടകം, കുതിര) ഇടനിലക്കാരായി നിന്നേക്കാം (Intermediate host). ഇവരുമായി ഇടപഴകുന്നതുമൂലമാണ് ഇവ മനുഷ്യനിലേക്ക് കടക്കുന്നത് (Zoonosis). ഈ വൈറസ് നിസ്സാരക്കാരനല്ല എന്ന് മനസ്സിലാക്കുന്നത് രണ്ടായിരമാണ്ടോടു കൂടിയാണ്.

2002 നവംബർ മാസത്തിൽ ചൈനയിലെ ഗുവാൻഗ്ഡോംഗ് പ്രവിശ്യയിൽ ഒരു കൃഷിക്കാരൻ ചുമ, ശ്വാസതടസ്സം തുടങ്ങിയ രോഗങ്ങളുമായി ആശുപത്രിയിൽ പ്രവേശിക്കപ്പെടുകയും മരുന്നുകൾ ഒന്നും ഫലിക്കാതെ മരണപ്പെടുകയും ചെയ്തു. തുടർന്ന് പ്രവിശ്യയിലെ ആശുപത്രികളിൽ സമാനമായ രോഗലക്ഷണങ്ങളോടുകൂടി നിരവധി പേർ അഡ്മിറ്റു ചെയ്യപ്പെടുകയും മരണമടയുകയും ചെയ്തു. ഡിസംബർ മാസമാകുമ്പോഴേക്കും അഞ്ഞൂറോളം മരണങ്ങൾ റിപ്പോർട്ടുചെയ്യപ്പെട്ടു. അസുഖബാധിതകർക്ക് ഗുരുതരമായ ശ്വാസതടസ്സം അനുഭവപ്പെടുന്നതിനാൽ ഈ അസുഖത്തെ ഗുരുതരമായ ശ്വാസകോശരോഗം (Severe Acute Respiratory Distress Syndrome – SARS) എന്ന് വിളിക്കപ്പെട്ടു. അതേസമയം ഗുവാൻഗ്ഡോംഗിൽ രോഗികളെ ചികിത്സിച്ച ഒരു ഡോക്ടർ ഹോങ്കോങ്ങിലേക്ക് യാത്ര തിരിക്കുകയും അവിടെ ഒരു ഹോട്ടലിൽ കുടുംബാംഗങ്ങളോടൊപ്പം താമസിക്കുകയും ചെയ്തു. അദ്ദേഹം അവിടെ നിന്ന് ഇതേ രോഗം വന്ന് മരണപ്പെട്ടതോടെ ചൈനയ്ക്ക് പുറത്തേക്കുള്ള ഈ രോഗത്തിന്റെ വ്യാപനം ശ്രദ്ധിക്കപ്പെട്ടു. അതേ സമയം ഹോങ്ങ്കോങ്ങിൽ നിന്നും തിരിച്ചെത്തിയ ഒരു വിനോദസഞ്ചാരി കാനഡയിലെ ടൊറാന്റോയിൽ ഈ രോഗം പടർന്നുപിടിക്കുന്നതിന് ഹേതുവായി. അപ്പോഴേയ്ക്കും വിയറ്റ്നാം, സിംഗപ്പൂർ തുടങ്ങിയ രാജ്യങ്ങളിൽ ഈ രോഗം റിപ്പോർട്ടു ചെയ്യപ്പെട്ടു.

ലോകത്താകമാനം എണ്ണായിരത്തോളം പേർക്ക് ഈ രോഗം സ്ഥിരീകരിക്കപ്പെട്ടു. അതിൽ എണ്ണൂറോളം പേർ, അതായത്, പത്തുശതമാനം മരണപ്പെട്ടു. തുടർന്ന് രോഗവ്യാപനം കുറയുകയും 2003 ജൂലായ് അഞ്ചോടെ രോഗവ്യാപനം ഏതാണ്ട് അവസാനിച്ചു എന്ന് ലോകാരോഗ്യ സംഘടന സ്ഥിരീകരിക്കുകയും ചെയ്തു.

രോഗത്തിന് കാരണമായ വൈറസ് പുതിയതരം കൊറോണ വൈറസാണെന്ന് കണ്ടുപിടിച്ചു. (SARS-COV) രോഗാണു വ്യാപനത്തിന്റെ ഉത്ഭവം കണ്ടുപിടിക്കുന്നതിനായുള്ള അന്വേഷണം ചെന്നെത്തിയത് ചൈനയിലെ ഗുവാങ്ഡോംഗ് പ്രവിശ്യയിലുള്ള ഒരു മാംസ മാർക്കറ്റിലാണ്. അവിടെ നിന്ന് ചൈനയിലെ ഒരു തരം വവ്വാലിൽ നടത്തിയ പരീക്ഷണങ്ങളിൽ ഇതേ വൈറസ് കണ്ടെത്തി. മാർക്കറ്റിന്റെ അടുത്തുള്ള യുനാൻ പ്രവിശ്യയിലെ ഒരു ഗുഹയിൽ ധാരാളം വവ്വാലുകൾ (Horseshoe bats) വസിക്കുന്നതായും ശ്രദ്ധിക്കപ്പെട്ടു.

അടുത്ത ഊഴം സൗദി അറേബ്യയുടേതായിരുന്നു. 2012 ൽ പനി, ചുമ, കഫക്കെട്ട് എന്നീ ലക്ഷണങ്ങളോടെ സൗദി അറേബ്യയിൽ ധാരാളം പേർ ആശുപത്രിയിൽ പ്രവേശിക്കപ്പെടുകയും മരണപ്പെടുകയും ചെയ്തു. 2014 ജൂൺ മാസമായപ്പോഴേയ്ക്കും സൗദി അറേബ്യയിൽ മുന്നൂറോളം പേർ ഈ രോഗം മൂലം മരണപ്പെട്ടു. ഈ രോഗത്തെ മെർസ് (Middle East Respiratory Syndrome- MERS) എന്നു വിളിപ്പേരിട്ടു. 2015 ൽ ദക്ഷിണ കൊറിയയിൽ ഈ രോഗം പൊട്ടിപ്പുറപ്പെട്ടു. ഇതുവരെ 3000 പേരിൽ ഈ രോഗം സ്ഥിരീകരിക്കപ്പെട്ടിട്ടുണ്ട്. രോഗബാധിതരിൽ മൂന്നിലൊന്നു പേർ മരണപ്പെട്ടു. മരിച്ചവരിൽ മിക്കവരും പ്രായമായവരും ഹൃദ്രോഗം, കരൾരോഗം, പ്രമേഹം, വൃക്കരോഗം തുടങ്ങിയ രോഗാവസ്ഥയുള്ളവർ ആയിരുന്നു.

ഈ അസുഖം കൊറോണ വൈറസിന്റെ ഒരു വകഭേദമാണെന്ന് സ്ഥിരീകരിക്കുകയും അതിനെ മെർസ്- കൊറോണ വൈറസ് (MERS-COV) എന്ന് നാമകരണം ചെയ്യുകയും ചെയ്തു. വൈറസിന്റെ ഉറവിടം തേടിപ്പോയ ശാസ്ത്രജ്ഞർ എത്തിയത് അറേബ്യൻ ഒട്ടകത്തിന്റെ സമീപത്തേക്കാണ്.

മൂക്കിൽ നിന്നെടുത്ത ഒട്ടകത്തിന്റെ സ്രവങ്ങളിൽ നിന്ന് വേർതിരിച്ച വൈറസും രോഗികളിൽ കണ്ടെത്തിയ വൈറസും ഒന്നാണെന്നറിഞ്ഞതോടെ ഇടനിലക്കാരൻ (Intermediary host) ഒട്ടകമാണെന്നു മനസ്സിലായി. ഈ രോഗത്തിന് ഒട്ടകപ്പനി (Camel Flu) എന്നും പേരുണ്ട്. ഒട്ടകത്തിന്റെ ഇറച്ചി, ഒട്ടക പാൽ എന്നിവ നന്നായി ചൂടാക്കാതെ കഴിക്കരുതെന്ന് നിയമം വന്നു. പ്രഥമ സ്രോതസ്സിലേക്കുള്ള (Primary Reservoir) അന്വേഷണം ചെന്നുനിൽക്കുന്നത് വവ്വാലുകളിൽ തന്നെ.

കൊറോണ വൈറസ് അതിന്റെ മൂന്നാം ലോകവ്യാപനത്തിന്റെ (Pandemic) വരവറിയിച്ചത് 2019 ഡിസംബർ 31 നാണ്. ചൈനയിലെ ഹ്യൂബൈ (Hubei) എന്ന പ്രവിശ്യയുടെ തലസ്ഥാനമായ വുഹാനിൽ (Wuhan) കുറച്ചുപേർ ഒരു പ്രത്യേകതരത്തിലുള്ള കഫക്കെട്ട് (Pneumonia) മൂലം മരണപ്പെടുന്നതായി ശ്രദ്ധിക്കപ്പെട്ടു. ജനവരിയിൽ ഇത് ഒരു പകർച്ചവ്യാധിയുടെ രൂപം പ്രാപിച്ചു. ഈ വൈറസിന്റെ സ്രോതസ്സിനെക്കുറിച്ച് അന്വേഷിച്ചവർ എത്തിയത് ഹുനാൻ സീ ഫുഡ് മാർക്കറ്റിലാണ് (Huanan Seafood Wholesale Market). കൊറോണ വൈറസിന്റെ വകഭേദമായ ഈ വൈറസിനെ സാർസ്- കൊറോണ 2 (SARS-COV 2) എന്നു പേരിട്ടു. ഇതിന്റെ പ്രഥമ സ്രോതസ്സ് വവ്വാൽ ആണെന്നും സ്ഥിരീകരിക്കപ്പെട്ടു.

മറ്റ് കൊറോണ വൈറസുകളെ അപേക്ഷിച്ച് പുതിയ (Novel) കൊറോണ വൈറസിന്റെ വ്യാപനം വളരെ പെട്ടെന്നായിരുന്നു. മാർച്ച് ആയപ്പോഴേയ്ക്കും ഈ അസുഖം ലോകമൊട്ടാകെ സംഹാരതാണ്ഡവമാടുകയാണ്. മാർച്ച് 11 ൽ ലോകാരോഗ്യസംഘടന ഈ അസുഖത്തെ ലോകവ്യാപനം (Pandemic) എന്ന് അംഗീകരിച്ചു.
ഈ ലേഖനം എഴുതുന്ന സമയത്ത് ലോകമെമ്പാടും 210 രാജ്യങ്ങളിൽ ഈ രോഗം പടർന്നുപിടിച്ചിട്ടുണ്ട്. ഏതാണ്ട് 20 ലക്ഷം പേർക്ക് ഈ രോഗം പിടിപെടുകയും ഒന്നേമുക്കാൽ ലക്ഷത്തിലധികം പേർ മരണപ്പെടുകയും ചെയ്തിട്ടുണ്ടെന്ന് ഔദ്യോഗിക കണക്കുകൾ സൂചിപ്പിക്കുന്നു.

നാം പഠിക്കണം ചില പാഠങ്ങൾ

കൊറോണ വൈറസ് ലോകത്താകമാനം നാശം വിതക്കുമ്പോൾ നാം പഠിക്കേണ്ട പാഠങ്ങൾ ഏറെയാണ്.

അതിവേഗം രൂപമാറ്റം സംഭവിക്കുന്ന വൈറസുകൾ പടർന്നുപിടിക്കുമ്പോൾ നാം ഇതുവരെ കണ്ടെത്തിയിട്ടുള്ള മരുന്നുകൾ ഒന്നും തന്നെ ഇവയ്ക്കെതിരെ ഫലപ്രദമാകില്ലെന്ന് കാണാം. അതുപോലെ അവയ്ക്കെതിരെ പ്രതിരോധിക്കുവാൻ ഉതകുന്ന വാക്സിൻ പെട്ടെന്ന് ക്ലിനിക്കൽ ട്രയലുകൾ കഴിഞ്ഞ് പുറത്തിറങ്ങാനും സാധ്യതയില്ല. സാർസ്-1, മെർസ്, എബോള തുടങ്ങിയ രോഗങ്ങൾക്ക് ഫലപ്രദമായ വാക്സിനുകൾ ഇനിയും കണ്ടുപിടിച്ചിട്ടില്ല. ആധുനിക ചികിത്സയുടെ മകുടോദാഹരണങ്ങൾ എന്നു വിശേഷിപ്പിക്കുന്ന ഇറ്റലിയിലേയും സ്പെയിനിലേയും മറ്റും എല്ലാ സജ്ജീകരണങ്ങളോടും കൂടിയ ആശുപത്രികളിൽ രോഗികൾ ഈയാംപാറ്റകളെപ്പോലെ മരിച്ചുവീഴുന്ന കാഴ്ചകൾ നാം കണ്ടുകൊണ്ടിരിക്കുകയാണിപ്പോൾ.

ഇവിടെയാണ് പൊതുജനാരോഗ്യ മേഖലയുടെ(Public Health) പ്രസക്തി. പ്രതിരോധത്തിലൂന്നിയുള്ള പ്രവർത്തനങ്ങൾ രോഗവ്യാപനത്തിന് ആക്കം കുറയ്ക്കുന്നു. തന്മൂലം വൻതോതിൽ രോഗം പൊട്ടിപ്പുറപ്പെടാതിരിക്കുകയും ക്രമേണ രോഗം സമൂഹത്തിൽ നിന്നു തന്നെ തുടച്ചുമാറ്റപ്പെടുകയും ചെയ്യുന്നു. വൻകിട ആശുപത്രികളും നൂതന ചികിത്സാ സൗകര്യങ്ങളും ലഭ്യമല്ലെങ്കിൽ തന്നെയും ശക്തമായ പൊതുജനാരോഗ്യപ്രവർത്തനത്തിന്റെ പിൻബലത്തോടെ നാം വരുതിയിലാക്കിയ അസുഖങ്ങൾ ഒട്ടേറെയാണ്. കോളറ, പോളിയോ, വസൂരി തുടങ്ങി നിപ വരെ ഇക്കൂട്ടത്തിൽ പെടുത്താവുന്ന രോഗങ്ങളാണ്. കോവിഡ്- 19 (കൊറോണ) രോഗത്തിനെ നാം പിടിച്ചുനിർത്തുന്നതും ഇതേ മാർഗങ്ങൾ അവലംബിച്ചു കൊണ്ടുതന്നെയാണ്.

തികച്ചും ലളിതവും അതിനാൽ തന്നെ നാം തീരെ പ്രാധാന്യം കൊടുക്കാത്തതുമായ ചില അടിസ്ഥാന തത്ത്വങ്ങളാണ് പ്രതിരോധത്തിലൂന്നിയുള്ള ചികിത്സയുടെ കാതൽ. ഈ മന്ത്രങ്ങളാണ് ഇന്ന് നമ്മെ മുന്നോട്ടുനയിക്കുന്നത്. ഇത്തരം തത്ത്വങ്ങൾ ഈ കൊറോണക്കാലം കഴിഞ്ഞാലും നാം മറന്നുപോയില്ലെങ്കിൽ ഇവിടെ ഇടയ്ക്കിടെ തലപൊക്കുന്ന പല സാംക്രമിക രോഗങ്ങളിൽ നിന്നും വളരെ വേഗം മുക്തിനേടിയേനെ. ഇതാണ് ഈ കൊറോണക്കാലത്ത് നാം പഠിക്കേണ്ട പ്രധാന പാഠം.

നാം എന്നും ഓർക്കേണ്ട ചില കാര്യങ്ങൾ
  • സോപ്പുപയോഗിച്ച് കൈകൾ ശുദ്ധിയാക്കുക

കേൾക്കുമ്പോൾ ഒരു പുതുമയുമില്ല. പക്ഷേ കൊറോണ പോലുള്ള പല വൈറസുകളുടെയും പുറന്തോട് (Protective Envelop) സോപ്പു ലായനികൊണ്ട് നശിക്കപ്പെടും എന്നതാണ് ഈ തത്ത്വത്തിന്റെ പിന്നിലുള്ള ശാസ്ത്രം. 20 സെക്കൻഡ് നേരം സോപ്പുവെള്ളമുപയോഗിച്ച് കൈകൾ ശുദ്ധിയാക്കണമെന്നാണ് ശാസ്ത്രം അനുശാസിക്കുന്നത്. സോപ്പുവെള്ളത്തോളമെത്തില്ലെങ്കിലും 60 ശതമാനത്തിൽ കുറയാത്ത ആൽക്കഹോൾ അടങ്ങിയ സാനിറ്റൈസർ ഉപയോഗിച്ചാലും വൈറസിനെ ഒരു പരിധിവരെ നിർവ്വീര്യമാക്കാൻ കഴിയും. ദശാബ്ദങ്ങൾക്കപ്പുറം കോളറ മൂലം കുഞ്ഞുങ്ങൾ മരണപ്പെട്ടപ്പോൾ ബംഗ്ലാദേശ് മുതലായ രാജ്യങ്ങളിൽ ശൗചാലയത്തിൽ പോയതിനുശേഷം സോപ്പുപയോഗിച്ച് കൈകഴുകുന്നതിന്റെ ആവശ്യകതയെക്കുറിച്ച് ആരോഗ്യ പ്രവർത്തകർ ജനങ്ങളെ ബോധവാന്മാരാക്കിയിരുന്നു. പിന്നീട് ഈ കാര്യം നാം എപ്പോഴോ മറന്നു.

  • ചുമയ്ക്കുമ്പോൾ ടിഷ്യൂ പേപ്പർ കൊണ്ടോ ടവ്വൽ കൊണ്ടോ വായ മൂടുക

കൊറോണ പോലുള്ള പല വൈറസുകളും മൂക്കിലും തൊണ്ടയിലുമാണ് വസിക്കുന്നത്. അതിനാൽ ചുമയ്ക്കുമ്പോഴും തുമ്മുമ്പോഴും ആയിരക്കണക്കിന് വൈറസുകൾ ജലകണികകൾക്കൊപ്പം പുറത്തുവരാം. അത് അടുത്തിരിക്കുന്നവർക്ക് രോഗവ്യാപനത്തിന് കാരണമായേക്കാം. നാം ആരോഗ്യകരമായി ചുമയ്ക്കാൻ (Cough Etiquette) ഇനിയും പഠിക്കേണ്ടിയിരിക്കുന്നു. ചുമയ്ക്കുമ്പോഴും തുമ്മുമ്പോഴും വായയും മൂക്കും ഒരു ടിഷ്യൂ പേപ്പർ കൊണ്ടോ തൂവാല കൊണ്ടോ മറയ്ക്കുക. തുടർന്ന് ഈ ടിഷ്യൂ പേപ്പർ ഒരു ഡസ്റ്റ് ബിന്നിൽ നിക്ഷേപിക്കുകയും പിന്നീട് നശിപ്പിക്കുകയും ചെയ്യേണ്ടതാണ്. ടിഷ്യൂ പേപ്പർ ഇല്ലെങ്കിൽ വായയും മൂക്കും കൈമുട്ടുകൊണ്ട് മറച്ചുവെച്ച് ചുമയ്ക്കാവുന്നതാണ്. ജലദോഷവും ചുമയുമുള്ളവർ മാസ്ക്ക് ഉപയോഗിക്കുകയാണെങ്കിൽ വൈറസിന്റെ വ്യാപനം വളരെ കുറയ്ക്കാൻ സാധിക്കും. നമ്മുടെ ആശുപത്രികളിൽ ‘കഫ് കോർണർ’ (Cough Corners) സ്ഥാപിച്ചതിന്റെ ലക്ഷ്യവും അതുതന്നെയാണ്. ചുമ, ജലദോഷം തുടങ്ങിയ അസുഖമുള്ളവർ ആശുപത്രിയിലെ കഫ് കോർണറിലേക്ക് അയക്കപ്പെടുകയും അവിടെ നിന്ന് അവരെ മാസ്ക്ക് ധരിപ്പിക്കുകയും അസുഖം മറ്റുള്ളവർക്ക് പകരാതിരിക്കാനുള്ള പ്രാഥമിക അറിവുകൾ പകർന്നുകൊടുക്കുകയും ചെയ്യുന്നു. ഈ ഒരു സൗകര്യം എത്രപേർ ഇതിനുമുമ്പ് ഉപയോഗപ്പെടുത്തിയിട്ടുണ്ട്? ചുമയും കഫക്കെട്ടുമുള്ള രോഗികൾ പരിശോധനാമുറിയുടെ മുന്നിൽ തിങ്ങിക്കൂടുന്ന കാഴ്ച സർവ്വസാധാരണമാണ്. കൊറോണക്കാലത്തിനുശേഷവും ആരോഗ്യകരമായി ചുമയ്ക്കുന്ന രീതി (Cough Etiquette) മറന്നുപോകാതിരുന്നെങ്കിൽ ഇനി വരാനിരിക്കുന്ന പല സാംക്രമിക രോഗങ്ങളും തടയാൻ കഴിഞ്ഞേനെ.

  • അടുത്തിടപെടുമ്പോൾ നമ്മൾ തമ്മിൽ അകലം പാലിക്കുക

പ്ലേഗ്, ഫ്ളൂ തുടങ്ങിയ അസുഖങ്ങൾ രോഗത്താകമാനം വ്യാപിച്ചിരുന്ന സമയത്തു തന്നെ അടുത്തിടപെടുമ്പോൾ അകലം പാലിച്ചാൽ(Physical Distancing or Social Distancing) രോഗവ്യാപ്തിയുടെ തീവ്രത കുറയ്ക്കാമെന്ന് നാം മനസ്സിലാക്കിയിരുന്നു. ചുമയ്ക്കുമ്പോൾ പുറത്തുവരുന്ന വൈറസ് വാഹകരായ ജലകണികകൾ രണ്ടു മീറ്ററിന് അപ്പുറത്തേക്ക് പറന്നെത്തുകയില്ല എന്ന തിരിച്ചറിവാണ് സാമൂഹിക അകലത്തിന്റെ കാതൽ. അടുത്തിടപഴകിയാൽ ഒരു രോഗിയിൽ നിന്ന് മൂന്നു പേർക്കെങ്കിലും കൊറോണ വൈറസ് പകരുവാൻ സാധ്യതയുണ്ടെന്നാണ് നിഗമനം. അതിനാൽ നാം ഒരകലം പാലിച്ചാൽ വൈറസിന്റെ വ്യാപനം വളരെ കുറയ്ക്കാൻ സാധിക്കും. ഈ കരുതലും കൊറോണക്കാലം കഴിഞ്ഞാലും നമ്മൾ മറക്കാതിരുന്നാൽ നന്ന്. മൺസൂൺ കാലമാവുമ്പോഴേയ്ക്കും ആശുപത്രിയിലെ പരിശോധനാ മുറിക്കുമുമ്പിലെ തിക്കും തിരക്കും എല്ലാ പൊതുജനാരോഗ്യ തത്ത്വങ്ങളെയും കാറ്റിൽ പറത്തുമോ എന്നാണ് ഇപ്പോഴത്തെ ഭയം. അതുപോലെ അപകടകരമായ ഒരു പ്രവണതയാണ് പൊതുസ്ഥലത്ത് തുപ്പുന്നത്. ഈ പ്രവണതയും കർശനമായി നിയന്ത്രിക്കപ്പെടേണ്ടതാണ്.

  • പരിസര ശുചീകരണം

രോഗികൾ ഉപയോഗിക്കുന്ന വസ്തുക്കൾ (ടി.വി., മൊബൈൽ, എ.ടി.എം. മെഷീൻ) വാതിൽപ്പിടി, ബാത്ത്റൂം, കട്ടിൽ തുടങ്ങിയവ എപ്പോഴും വൃത്തിയാക്കി വെയ്ക്കണം(Surface Cleaning).
സോഡിയം ഹൈപ്പോക്ലോറൈറ്റ് (Sodium hypochlorite 0.1%), ഹൈഡ്രജൻ പെറോക്സൈഡ് (Hydrogen peroxide 0.5%) പോവിഡോൺ-അയഡൻ (Povidone-iodine 0.2-7.5%) തുടങ്ങിയ അണുനാശിനികൾ ഇതിനായി ഉപയോഗിക്കാം. രോഗികളുടെ വസ്ത്രങ്ങൾ, കിടക്കവിരി തുടങ്ങിയവയും വൃത്തിയാക്കി വയ്ക്കണം.

  • അസുഖമുള്ള രോഗികൾ വീട്ടിൽനിന്ന് പുറത്തിറങ്ങരുത്

ക്വാറന്റൈൻ (Quarantine) എന്ന പദത്തിന്റെ അർത്ഥം 40 ദിവസം എന്നാണ്. ഒരു സാംക്രമിക രോഗം പടർന്നുപിടിച്ച ഒരിടത്തുനിന്ന്, രോഗവുമായി ഇടപഴകിയവരോ, സാധനസാമഗ്രികളോ മറ്റൊരിടത്തേക്ക് കടക്കുന്നത് നിയമം മൂലം നിരോധിക്കുന്ന പ്രക്രിയയൊണ് ക്വാറന്റൈൻ എന്ന പദം കൊണ്ട് വിവക്ഷിക്കപ്പെടുന്നത്. രോഗമുള്ളവരെ മറ്റുള്ളവരുമായി ഇടപെടുന്നതിനെ നിയന്ത്രിക്കുന്നു എന്നതാണ് ഐസൊലേഷൻ എന്ന പദം കൊണ്ട് അർഥമാക്കുന്നത്്. കൊറോണ ബാധിച്ച സ്ഥലങ്ങളിൽ നിന്നും വരുന്നവരും കൊറോണ ബാധിച്ച ഒരാളുമായി അടുത്തിടപെടുന്നവരും 14 ദിവസമെങ്കിലും വീട്ടിൽ തന്നെ ഇരിക്കുകയും മറ്റുള്ളവരോട് സമ്പർക്കത്തിലേർപ്പെടാതിരിക്കുകയും ചെയ്യണമെന്ന് നിഷ്കർഷിക്കപ്പെട്ടിട്ടുണ്ട്. അസുഖം പിടിപെട്ടവർ അസുഖം മാറിയശേഷം 28 ദിവസമെങ്കിലും മറ്റുള്ളവരിൽ നിന്നും അകന്നുനിൽക്കണമെന്നും സൂചിപ്പിക്കുന്നു. ഐസൊലേഷൻ എന്ന പദ്ധതി അഞ്ചാംപനി, ചിക്കൻപോക്സ് തുടങ്ങിയ സാംക്രമിക രോഗങ്ങൾ പകരുന്നതിനെ ഒരു പരിധി വരെ നിയന്ത്രിക്കാൻ സാധിച്ചിട്ടുണ്ട്. പറഞ്ഞുവരുന്നത് കൊറോണക്കാലം കഴിഞ്ഞാലും ഈ മന്ത്രം മറക്കരുതെന്നാണ്.

  • രോഗികളുമായി സമ്പർക്കമുള്ളവരെ കണ്ടുപിടിക്കുക

ഏതൊരു സാംക്രമികരോഗവും പൊട്ടിപ്പുറപ്പെടുന്നത് ആദ്യമേ മനസ്സിലാക്കി ‘മുളയിലേ നുള്ളിക്കഴിഞ്ഞാൽ’ രോഗവ്യാപനത്തിന്റെ വ്യാപ്തി വളരെ കുറയ്ക്കാനും തന്മൂലം തീരേ ഇല്ലാതാക്കാനും കഴിയും. ഈ പ്രക്രിയയെ കണ്ടെയ്ൻമെന്റ് (Containment) എന്നു പറയുന്നു. രോഗം പകരുന്നതിന്റെ പ്രാരംഭ ദശയിൽ തന്നെ രോഗികളെയും അവരുമായി സമ്പർക്കമുള്ളവരേയും കണ്ടുപിടിച്ച് (Contact Tracing) അവരെ ചികിത്സിക്കുകയും, മറ്റുള്ളവർക്ക് രോഗം പകരാതിരിക്കാനായി ഐസോലേറ്റ് ചെയ്യുകയുമാണ് ആദ്യ പടി. കുത്തിവയ്പുകൾ ഫലപ്രദമാകുന്ന രോഗങ്ങളാണെങ്കിൽ എല്ലാവർക്കും കുത്തിവയ്പുകൾ നൽകി (Mass Vaccination) രോഗം പടരുന്നത് തടയാനും ചിലപ്പോൾ രോഗം നിശ്ശേഷം തുടച്ചു നീക്കപ്പെടാനും സാധിക്കും. വസൂരി, പോളിയോ രോഗങ്ങൾ തുടച്ചുനീക്കപ്പെട്ടത് ഉദാഹരണങ്ങളാണ്. തുടക്കത്തിലേ തടയിടാൻ കഴിഞ്ഞാൽ വലിയൊരളവിലുള്ള രോഗവ്യാപനം തടയാൻ സാധിക്കും. ഇതിനെ ‘ഫ്ളാറ്റനിങ് ദ കർവ്’ (Flattening the curve) എന്നാണ് പറയുന്നത്. ചിലപ്പോൾ വൈറസ് വ്യാപനം കുറയ്ക്കേണ്ട ഉപാധികൾ ചെയ്യേണ്ടിവരും(Mitigation Method). ചിലയിടങ്ങളിൽ കൂടുതലായി രോഗവ്യാപനം നടക്കുന്ന സ്ഥലങ്ങൾ കണ്ടുപിടിച്ച് (Hot Spots) അവിടെ രോഗ വ്യാപനം പെട്ടെന്നു കുറയ്ക്കാനുള്ള നടപടികൾ സ്വീകരിക്കേണ്ടതായും വരും.

കൂടുതലായി ആളുകളെ പരിശോധിക്കുക (Mass Screening), രോഗികളെയും അവരുമായി ഇടപെടുന്നവരെയും മറ്റുള്ളവരുമായി ഇടപഴകുന്നത് നിയന്ത്രിക്കുക (Quarantine, Isolation), രോഗം മറ്റുള്ളവർക്ക് പകരാതിരിക്കാനുള്ള മാർഗ്ഗങ്ങൾ നടപ്പിലാക്കുക(കൈ കഴുകുക, മാസ്ക്ക് ഉപയോഗിക്കുക, സാമൂഹിക അകലം പാലിക്കുക), രോഗികളുമായി ഇടപഴകിയവരെയും രോഗ ലക്ഷണങ്ങളുള്ളവരെയും കണ്ടുപിടിക്കുക(Contact Trace) എന്നിവയാണ് നാം ഇപ്പോൾ ഉപയോഗിക്കുന്ന മാർഗങ്ങൾ.

കൊറോണ ഇപ്പോഴും ലോകത്താകമാനം മരണം വിതച്ചുകൊണ്ടിരിക്കുകയാണ്. സർക്കാർ, ആരോഗ്യപ്രവർത്തകർ, പോലീസ്, മാധ്യമങ്ങൾ, കർഷകർ എന്നിവർ ഒറ്റക്കെട്ടായി ഇതിനെതിരെ പോരാടുകയാണ്. ലക്ഷക്കണക്കിനാളുകൾ മരിച്ചുവീണാലും മഹാമാരിക്ക് അവസാനം ഉണ്ടാകും എന്ന് ചരിത്രം പരിശോധിച്ചാൽ മനസ്സിലാക്കാം.

പക്ഷേ ഇതിൽ നിന്ന് ഒരു പാഠം ഉൾക്കൊണ്ട് നാം മുന്നേറാൻ പഠിക്കണം. ഈ കാലത്ത് നാം പഠിച്ച തത്ത്വങ്ങൾ മറക്കാതിരിക്കാൻ ശ്രമിക്കണം. കാരണം മറ്റൊരു വൈറസോ ബാക്ടീരിയയോ തക്കം പാർത്ത് കാത്തിരിക്കുന്നുണ്ടാകും.

ഈ ലോക്ക്ഡൌൺ കാലത്തു പ്രതിരോധകുത്തിവെപ്പിന്റെ പ്രാധാന്യം

Previous article

Immunization in the time of COVID

Next article

You may also like

Comments

Leave a reply

Your email address will not be published. Required fields are marked *