COVID-19
COVID-19Health

കോവിഡ് 19: എന്താണ് പ്ലാസ്മാ ചികിത്സയും സ്റ്റെം സെല്‍ തെറാപ്പിയും

ഡോ. എം.വിജയകുമാര്‍
പ്രൊഫസർ & ഹെഡ് 
ഗവണ്മെന്റ് മെഡിക്കൽ കോളേജ് മഞ്ചേരി 

കോവിഡ് ലോകമെമ്പാടും നാശം വിതയ്ക്കുന്ന ഇക്കാലത്ത് പത്രത്താളുകളിൽ നിറഞ്ഞുനിൽക്കുന്ന ഒരു ചികിത്സാരീതിയാണ് പ്ലാസ്മാ ചികിത്സയും സ്റ്റെംസെൽ തെറാപ്പിയും. ചൈനയിലും അമേരിക്കയിലും പ്ലാസ്മാ ചികിത്സ രോഗികളിൽ വിജയകരമായി പരീക്ഷിച്ചിട്ടുണ്ട്. ഇന്ത്യയിലും ചിലയിടങ്ങളിൽ ഈ ചികിത്സ ഉപയോഗിച്ചിട്ടുണ്ട്. ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്റെ (ICMR) അനുവാദം കാത്തിരിക്കുകയാണ് മിക്ക ഗവേഷകരും.

എന്താണ് പ്ലാസ്മാ ചികിത്സ
ഏതെങ്കിലും പ്രത്യേക അസുഖത്തിന്റെ രോഗാണുക്കൾ നമ്മുടെ ശരീരത്തിൽ പ്രവേശിച്ചാൽ നമ്മുടെ രക്തത്തിലെ ശ്വേതാണുക്കളിൽ ചില രോഗപ്രതിരോധത്തിനായുള്ള ആന്റിബോഡികൾ ഉത്പാദിപ്പിക്കുന്നു. ഈ പ്രതിരോധ കണികകൾ പ്രസ്തുത രോഗത്തെ ചെറുക്കുന്നു. അസുഖം ഭേദമായ അവസ്ഥയിൽ നമ്മുടെ രക്തത്തിൽ ഇത്തരം കണികകൾ ധാരാളമായുണ്ടാകും. രക്തത്തിൽ നിന്ന് രക്തകോശങ്ങൾ (ചുവന്ന രക്താണുക്കൾ, ശ്വേതാണുക്കൾ) മാറ്റിയാൽ കിട്ടുന്ന ദ്രാവകത്തെയാണ് പ്ലാസ്മ എന്നു പറയുന്നത്. രോഗം ഭേദമായവരിൽ നിന്ന് വേർതിരിച്ചെടുക്കുന്ന പ്ലാസ്മയിൽ പ്രസ്തുത രോഗത്തിനെതിരായുള്ള ആന്റിബോഡികൾ കൂടുതലായുണ്ടാകും. അസുഖം ഭേദമായ രോഗിയുടെ ശരീരത്തിൽ നിന്ന് പ്ലാസ്മ വേർതിരിച്ചെടുത്ത് ശുദ്ധീകരിച്ച്, രോഗമുള്ള രോഗിക്ക് ദാനം ചെയ്യുന്ന പ്രക്രിയയാണ് പ്ലാസ്മാ ചികിത്സ.

നാം രോഗാവസ്ഥയിലാകുമ്പോഴും രോഗത്തെ ചെറുക്കാനായി പ്രതിരോധ കുത്തിവെപ്പ് എടുക്കുമ്പോഴും നമ്മുടെ രോഗപ്രതിരോധ വ്യവസ്ഥ ആന്റിബോഡികൾ ഉത്പാദിപ്പിക്കുന്നുണ്ട്. എന്നാൽ ഇതിന് അല്പം കാലതാമസം എടുക്കാറുണ്ട് (2-4 ആഴ്ച). നമ്മുടെ ശരീരത്തിൽ ആന്റിബോഡികൾ നിർമ്മിക്കപ്പെടുന്നതിന് മുൻപ് രോഗാവസ്ഥ ഗുരുതരമായെങ്കിൽ ഈ രോഗം ഭേദമായവരിൽ നിന്ന് വേർതിരിച്ചെടുത്ത പ്ലാസ്മ പ്രസ്തുത രോഗിക്ക് റെഡിമെയ്ഡ് ആയി കൊടുക്കാം. ഈ പ്രതിരോധ കണികകൾ ഗുരുതരമായ രോഗവ്യാപനത്തെ ഫലപ്രദമായി ചെറുക്കുന്നു.

സാധാരണയായി പല അസുഖങ്ങൾക്കും ആന്റിബോഡികൾ കൊടുക്കാറുണ്ട്. ഇത്തരത്തിൽ രോഗപ്രതിരോധം വർധിപ്പിക്കുന്ന പ്രക്രിയയെ പാസ്സീവ് ഇമ്മ്യൂണിറ്റി എന്നാണ് വിളിക്കാറ്. പക്ഷേ ഇത്തരത്തിലുള്ള രോഗപ്രതിരോധശക്തി വർഷങ്ങളോളം നിലനിൽക്കുന്നതാണ്. മഞ്ഞപ്പിത്തം, ചിക്കൻ പോക്സ് തുടങ്ങിയ രോഗങ്ങൾക്ക് ആന്റിബോഡി ചികിത്സ ഉപയോഗിക്കുന്നുണ്ട്.

മഹാമാരികൾ പടർന്നുപിടിക്കുന്ന സമയത്ത് പ്ലാസ്മ ചികിത്സ ഉപയോഗിക്കുന്ന രീതിയും പുതിയതല്ല. 1918 ലെ സ്പാനിഷ് ഫ്ളൂ വ്യാപനവേളയിൽ ഈ ചികിത്സ ഉപയോഗിച്ചിരുന്നു. 2015 ലെ മെർസ്, 2009 ലെ എച്ച്.വൺ.എൻ.വൺ, 2014 ലെ എബോള വൈറസ് വ്യാപന സമയങ്ങളിലും പ്ലാസ്മ ചികിത്സ വിജയകരമായി നടത്തിയിട്ടുണ്ട്.

ഇപ്പോഴത്തെ കോവിഡ് 19 വ്യാപന സമയത്ത് ചൈനയിൽ പ്ലാസ്മ ചികിത്സ വിജയകരമായി പരീക്ഷിച്ചതിന്റെ പഠന റിപ്പോർട്ടുകൾ ഈയിടെ പ്രസിദ്ധീകരിച്ചിട്ടുണ്ട്. അടുത്തിടെ മയോ ക്ലിനിക്ക് റിസർച്ച് മാഗസിനിലും പഠന റിപ്പോർട്ടുകൾ വന്നിട്ടുണ്ട്. ഇന്ത്യയിൽ തന്നെ ചില ആശുപത്രികളിൽ ഗുരുതരാവസ്ഥയിലുള്ള രോഗികൾക്ക് പ്ലാസ്മാ ചികിത്സ വിജയകരമായി നൽകിയിട്ടുണ്ട്.

എന്താണ് സ്റ്റെം സെൽ തെറാപ്പി
മൂലകോശം അഥവാ സ്റ്റെം സെൽ എന്നത് മനുഷ്യശരീരത്തിലെ ആദിമ രൂപത്തിലുള്ള കോശങ്ങളാണ്. ഇത്തരം കോശങ്ങൾക്ക് ഏതുരൂപത്തിലുള്ള കോശങ്ങളായും രൂപാന്തരപ്പെടാനുള്ള പ്രാപ്തിയുണ്ട്. സാധാരണയായി ഭ്രൂണങ്ങളിൽ നിന്ന് (എംബ്രിയോണിക് സ്റ്റെ സെൽസ്- ESC) ഈ കോശങ്ങൾ വേർതിരിച്ചെടുക്കുന്നു. മറുപിള്ളയിൽ നിന്നും ഇത്തരം കോശങ്ങളെ വേർതിരിച്ചെടുക്കാറുണ്ട്. പേശികൾ, കൊഴുപ്പ്, കരൾ, മജ്ജ എന്നിവയിൽ നിന്നും മൂലകോശങ്ങൾ വേർതിരിച്ചെടുക്കാം. സ്റ്റെം സെൽ ചികിത്സ രക്താർബുദത്തിന് വളരെ ഫലപ്രദമാണ്.

ചൈനയിൽ കോവിഡ് പൊട്ടിപ്പുറപ്പെട്ട സമയത്ത് സ്റ്റെം സെൽ ചികിത്സ ഫലവത്താണെന്ന് കണ്ടിരുന്നു. ബീജിങ്ങിലെ യുവാൻ ആശുപത്രിയിൽ നിന്ന് സ്റ്റെം സെൽ ചികിത്സയെക്കുറിച്ചുള്ള പ്രബന്ധങ്ങൾ പുറത്തുവന്നിട്ടുണ്ട്. മറുപിള്ളയിൽ നിന്നെടുത്ത സ്റ്റെം സെൽ ഗുരുതരമായ രോഗംബാധിച്ച ഏതാനും പേർക്ക് കുത്തിവെയ്ക്കുകയും അവയിൽ രോഗാവസ്ഥയുടെ കാഠിന്യം കുറയ്ക്കുവാൻ കഴിയുകയും ചെയ്തു എന്ന് പഠന റിപ്പോർട്ടിലുണ്ട്. രോഗത്തിന്റെ ഏറ്റവും ഗുരുതരാവസ്ഥയാണ് സൈറ്റോകൈൻസ് സ്റ്റോംസ് (Cytokine Storms). ഇത്തരം അവസ്ഥയിൽ രോഗിയുടെ രോഗപ്രതിരോധ സംവിധാനത്തെ ഉദ്ദീപിക്കുവാൻ ഇത്തരം ചികിത്സയ്ക്ക് കഴിയുന്നു.
അമേരിക്ക, ഇസ്രായേൽ തുടങ്ങിയ രാജ്യങ്ങളിൽ സ്റ്റെം സെൽ ചികിത്സയ്ക്കായുള്ള അനുമതി ലഭിച്ചിട്ടുണ്ട്. ഇന്ത്യയിലെ കോവിഡ് രോഗികൾക്കുള്ള മൂലകോശ ചികിത്സയുടെ അനുമതിക്കുവേണ്ടിയുള്ള അപേക്ഷകൾ പൂനെയിലുള്ള നാഷണൽ സെന്റർ ഫോർ സെൽ സയൻസസ് തുടങ്ങിയ സ്ഥാപനങ്ങൾ നൽകിയിട്ടുണ്ട്. മറ്റു ചികിത്സകൾ പോലെ സ്റ്റെം സെൽ ചികിത്സയും ഇപ്പോൾ ശൈശവാവസ്ഥയിലാണ്. കൂടുതൽ പഠന റിപ്പോർട്ടുകൾക്കായി ലോകം കാത്തിരിക്കുന്നു.

താലസീമിയയെ കുറിച്ചു അറിഞ്ഞിരിക്കേണ്ടത് ….

Previous article

COVID-19 Treatment and Food Lifestyle- Elizabeth KE

Next article

You may also like

Comments

Leave a reply

Your email address will not be published. Required fields are marked *